Categories
EFESIËRS

EFESIËRS 4

Die eenheid van die gemeente

1 Ek doen dus ’n beroep op julle, ek wat ’n gevangene in diens van die Here is: Leef ’n lewe wat pas by die waardigheid van die roeping waarmee julle geroep is.

2 Met totale beskeidenheid en sagmoedigheid, ja, met geduld moet julle mekaar in liefde verdra.

3 Deur in vrede met mekaar te lewe, moet julle julle daarop toelê om die eenheidsband te bewaar wat die Gees bewerk het.

4 Daar is net één Gees, net soos julle net één toekomsverwagting het op grond van julle roeping –

5 één Here, één geloof, één doop,

6 één God, ons almal se Vader;

Hy heers oor almal,

werk deur almal

en woon in almal.

7 Maar aan elkeen van ons afsonderlik is volgens Christus se vrygewigheid ’n genadegawe gegee.

8 Daarom sê die Skrif:

“Toe Hy in die hoogte opgevaar het,

het Hy krygsgevangenes

meegevoer

en geskenke aan die mense

gegee.”

9 Wat beteken “Hy het opgevaar” anders as dat Hy eers vooraf moes neergedaal het na dit wat laer is, naamlik na die aarde toe?

10 Dieselfde Persoon wat neergedaal het, is ook die Een wat opgevaar het tot ver bo die wolke- en sterrehemel sodat Hy die heelal met sy teenwoordigheid kan vul.

11 Hý het sommige as apostels gegee, ander as profete, ander as evangeliste, en ander as herders en leraars,

12 om God se mense toe te rus vir hulle dienswerk. Hulle werk is om Christus se liggaam op te bou.

13 So sal ons uiteindelik almal deur geloof en deurdat ons die Seun van God ken, ’n eenheid vorm, ’n volmaakte mens, wat aan die standaard van Christus se volmaaktheid voldoen.

14 Dan, as mense ons met slinksheid en slimstreke op verkeerde paaie wil lei, sal ons nie meer soos klein kindertjies wees nie. Ons sal nie meer omgewaai of weggewaai word deur die wind van elke ding wat hulle verkondig nie.

15 Nee, terwyl ons mekaar liefhet, sal ons by die waarheid bly en so in alle opsigte groei om soos Christus te wees. Dit werk so: Christus is die Hoof.

16 Onder leiding van die Hoof is die liggaam goed aanmekaargesit. Al die ondersteunende ligamente hou die liggaam bymekaar. Elke liggaamsdeel vervul sy bestemde funksie, en so, deur liefde te bewys, bou die liggaam homself op.

Lééf die nuwe lewe

17 Daarom sê ek met God se gesag: Moenie langer soos nie-Christene lewe nie. Wat hulle uitdink, is niksseggend;

18 hulle verstand is verduister. Omdat hulle onkundig is en onwillig is om tot bekering te kom, ken hulle nie die lewe wat God gee nie.

19 Omdat hulle nie omgee vir wat reg of verkeerd is nie, gee hulle hulleself oor aan losbandigheid, en beoefen so gretiglik elke vorm van onreinheid.

20 Maar dis nie hoe julle Christus leer ken het nie!

21 Julle het tog van Hom gehoor. Julle het tog aangaande Homonderrig ontvang volgens die waarheid wat daar by Jesus is. Julle het tog in julle eenheidsband met Jesus die waarheid geleer,

22 naamlik dat julle, wat julle vroeëre leefstyl betref, die ou, sondige mens soos vuil klere moet uittrek. Bedrieglike begeertes laat hierdie mens te gronde gaan.

23 Julle moet op ’n nuwe, geestelike manier leer dink.

24 Ja, trek die nuwe mens soos skoon klere aan, die mens wat na God se beeld geskape is: iemand wat werklik reg lewe voor God en werklik aan Hom toegewy is.

25 Daarom moet julle die leuen aflê en die waarheid teenoor mekaar praat. Ons is tog lede van dieselfde liggaam.

26 Moenie sondig as jy kwaad word nie. Moenie tot die aand toe kwaad bly,

27 en die duiwel so ’n houvas gee nie.

28 Die dief moet ophou steel en eerder hard werk. Hy moet sy eie hande vir eerlike werk gebruik sodat hy iets kan hê om met mense in nood te deel.

29 Moenie enige vuil taal gebruik nie. Gebruik eerder die regte, opbouende woorde wat nodig is om dié wat luister, te bevoordeel.

30 Ja, moenie God se Heilige Gees hartseer maak nie. In julle eenheidsband met die Heilige Gees lê julle waarborg dat julle God se verlossingsdag sal belewe.

31 Raak saam met alle ander slegte dinge ontslae van alle bitterheid, woede, wraak, geskel en gevloek.

32 Wees eerder vriendelik met mekaar. Gee vir mekaar om. Vergewe mekaar soos God julle vergewe het op grond van wat Christus gedoen het.

—https://api-cdn.youversionapi.com/audio-bible-youversionapi/553/32k/EPH/4-4d404b039c6df65f72d625ca2313fa29.mp3?version_id=117—

Categories
EFESIËRS

EFESIËRS 5

Lewe in die lig

1 Omdat julle God se kinders is wat Hy liefhet, moet julle sy voorbeeld volg.

2 Ja, leef ’n lewe van liefde soos ook Christus ons liefgehad het deur Homself vir ons oor te gee as ’n lieflike reukoffer aan God.

3 Soos dit pas by mense wat aan God behoort, moet daar onder julle geen sprake wees van seksuele sondes, immorele optredes of gierigheid nie.

4 Ook skurwe stories, ligsinnige praatjies en vulgêre grappe pas nie by julle nie. Wat by julle pas, is om God te dank.

5 Want hiervan kan julle seker wees: niemand wat seksuele sondes en immorele dade doen, en niemand wat gierig lewe – so iemand dien immers ’n afgod – sal ’n erfdeel ontvang in die koninkryk van Christus en van God nie.

6 Moenie om die bos gelei word deur mense wat verskonings soek vir hierdie sondes nie. Die feit is: omdat mense deur sulke dinge aan God ongehoorsaam is, word hulle deur sy straf getref.

7 Dus: moenie saam met hulle aan hierdie dinge deelneem nie.

8 Julle lewe was vroeër nag! Nou egter, deur julle verbondenheid met die Here, is julle inderdaad die ene lig. Leef dan soos mense van die lig.

9 Uit dié lig kom mos alles wat goed en reg en waar is.

10 Vind uit watter dinge die Here tevrede stel

11 en moenie aanhou deelneem aan die nuttelose werke van die duisternis nie. Nee, ontmasker eerder hierdie werke,

12 want mense doen in die geheim dinge wat te skandelik is vir woorde.

13 Maar as die lig daarop skyn, kom alle dinge se ware karakter aan die lig,

14 en alles waarvan die ware karakter aan die lig kom, is self lig. Daarom sê die lied:

“Word wakker, jy wat slaap;

staan op uit die dood,

en Christus sal jou verlig!”

Leef Geesvervul!

15 Wees dus baie versigtig hoe julle lewe. Moenie soos dwase mense leef nie, leef wys!

16 Benut elke geskikte geleentheid, want ons lewe in slegte tye.

17 Moenie ondeurdag optree nie, maar probeer uitvind wat God se wil is.

18 Verder, moenie soveel wyn drink dat julle dronk word nie, dit lei tot uitspattige gedrag. Nee, laat die Heilige Gees julle lewe vol maak

19 en sing saam psalms en lofgesange en geestelike liedere. Sing en jubel met julle hele hart tot eer van die Here.

20 Sê altyd in die Naam van ons Here Jesus Christus vir God die Vader dankie vir alle dinge.

Die Christelike huwelik

21 Omdat julle respek het vir Christus, moet julle aan mekaar onderdanig wees.

22 Vroue, julle moet aan julle mans onderdanig wees, soos aan die Here.

23 Op dieselfde manier wat Christus hoof is van die kerk, is ’n man hoof van sy vrou. Christus het sulke hoofskap uitgeoefen toe Hy die kerk verlos het.

24 Soos die kerk aan Christus onderdanig is, moet julle, vroue, in alles elkeen aan julle eie man onderdanig wees.

25 Mans, julle moet julle vroue liefhê net soos Christus die kerk liefgehad het toe Hy sy lewe daarvoor gegee het

26 om só die kerk aan God toe te wy nadat Hy die kerk met die water en deur die woord gereinig het en

27 sodat Hy die kerk in al sy skoonheid voor Hom kan stel, nie met enige vlek of plooi of enige ander onsierlikheid nie, maar aan God toegewy en onberispelik.

28 Op dieselfde manier moet mans hulle eie vroue liefhê. Hulle moet hulle liefhê asof hulle hulle eie liggame is. ’n Man wat sy eie vrou liefhet, het dus eintlik homself lief.

29 ’n Mens haat mos nie jou liggaam nie, maar voed en versorg dit. Christus maak net so met ons, die kerk,

30 omdat ons ledemate van sy liggaam is.

31 Daar staan mos: “’n Man sal weggaan van sy pa en ma en een word met sy vrou, en hulle twee sal een wees.”

32 Dit is eintlik ’n diep geheim, en ek noem dit om die verhouding tussen Christus en die kerk te beskryf.

33 Dit geld egter ook vir julle: Elkeen van julle moet sy eie vrou liefhê soos hy homself liefhet, en die vrou moet haar man respekteer.

—https://api-cdn.youversionapi.com/audio-bible-youversionapi/553/32k/EPH/5-50e3430d0923f8278dbd52a8ccdad47e.mp3?version_id=117—

Categories
EFESIËRS

EFESIËRS 6

Ouers en kinders

1 Kinders, omdat julle aan die Here verbonde is, moet julle aan julle ouers gehoorsaam wees. Dit is mos die regte ding om te doen!

2 “Eer jou vader en jou moeder” is die eerste van die Tien Gebooie waaraan ’n belofte verbind is:

3 “Sodat dit met jou goed mag gaan en jy lank op die aarde mag lewe.”

4 En pa’s, moenie julle kinders so behandel dat hulle verbitterd word nie, maar voed hulle op met dissipline en teregwysing wat die Here se goedkeuring wegdra.

Slawe en eienaars

5 Slawe, wees gehoorsaam aan julle aardse eienaars. Respekteer en eerbiedig hulle sonder om skynheilig te wees. Gehoorsaam hulle soos julle Christus sou gehoorsaam.

6 Moenie mense probeer tevrede stel deur net gehoorsaam te wees wanneer hulle julle kan sien nie. Nee, werk as slawe van Christus wat met volle oorgawe God se wil doen.

7 Doen julle werk entoesiasties, asof julle dit vir die Here doen en nie vir mense nie.

8 Julle weet mos dat die Here elke mens wat sy werk goed doen, sal beloon, of dit nou slawe is of vry mense.

9 En eienaars, julle moet met dieselfde verantwoordelikheid teenoor julle slawe optree. Hou op om julle slawe te dreig. Julle weet mos dat julle een en dieselfde Eienaar in die hemel het, en dat Hý niemand voortrek nie.

Ons moet God se

gevegstoerusting aantrek

10 Ten slotte: Vind krag in julle verbondenheid aan die Here, ja, in die krag van sý sterkte!

11 Om staande te bly teen die listigheid van die duiwel moet julle God se gevegstoerusting aantrek.

12 Want ons stryd is nie teen mense nie, maar teen bose regeerders en maghebbers, teen die geeste wat heerskappy in hierdie donker wêreld uitoefen, teen die bose geeste in die hemelruimtes.

13 Daarom moet julle God se gevegstoerusting aantrek. Dan, wanneer die Bose julle aanval, sal julle weerstand kan bied, en na die hele geveg verby is, sal julle nog vas staan.

14 Staan dus vas deur waarheid as ’n gordel om julle heupe te dra en trek God se vryspraak as borsharnas aan.

15 Trek die bereidheid om die Goeie Nuus van vrede te verkondig, aan soos skoene aan julle voete.

16 Dra onder alle omstandighede die skild van die geloof. Daarmee kan julle al die brandpyle blus wat die Bose afskiet.

17 Gebruik God se verlossing as ’n helm om julle koppe te beskerm. En gebruik die swaard van die Gees, dit is God se woord.

18 Doen alles deur gebed en smeking. Laat die Gees julle elke keer in die gebed lei. Bly in alle omstandighede op julle hoede en bid vir almal wat aan God behoort.

19 Bid ook vir my, dat wanneer ek moet praat, woorde aan my gegee sal word om met vrymoedigheid die geheime plan van die Goeie Nuus bekend te maak.

20 As ambassadeur van hierdie Goeie Nuus is ek in boeie. Bid dat ek, soos dit hoort, die Goeie Nuus met vrymoedigheid sal verkondig.

Groete en slot

21 Tigikus, die geliefde broer, wat die Here getrou dien, sal julle alles vertel sodat julle kan weet hoe dit met my gaan en wat ek doen.

22 Ek stuur hom juis hiervoor na julle toe, dat julle kan weet hoe dit met ons gaan en gerusgestel kan word.

23 Mag God die Vader en die Here Jesus Christus vrede, liefde en geloof vir ons broers en susters gee.

24 Mag God se genade met almal wees wat ons Here Jesus Christus met ’n blywende liefde liefhet.

—https://api-cdn.youversionapi.com/audio-bible-youversionapi/553/32k/EPH/6-2ae823e116f4fc82f5fee7a4a8133842.mp3?version_id=117—

Categories
FILIPPENSE

FILIPPENSE 1

1
Paulus en Timoteus skryf aan

die gelowiges in Filippi en stuur

Hierdie brief kom van Paulus en Timoteus, diensknegte van Christus Jesus.

Ons skryf aan al God se mense in Filippi, al die Christene, ouderlinge en diakens ingesluit.

2 Die genade en die vrede van God ons Vader en die Here Jesus Christus sal met julle wees.

Paulus dank God vir die

gemeente

3 Elke keer as ek aan julle dink, dank ek God.

4 Ek bid altyd in al my gebede met blydskap vir julle almal

5 omdat julle, van die eerste dag wat julle die Goeie Nuus gehoor het, tot vandag toe saamgewerk het om dit verder uit te dra.

6 Ek is oortuig dat God die goeie werk wat Hy in julle begin het, sal voortsit totdat Hy dit voltooi op die dag wanneer Jesus Christus terugkom.

7 Dit is vanselfsprekend dat ek so oor julle almal voel omdat julle my na aan die hart lê. Julle almal deel saam met my in God se genade – wanneer ek in die tronk sit én wanneer ek die waarheid van die Goeie Nuus verdedig en bevestig.

8 God kan getuig hoe ek na julle almal verlang. Ek gee vir julle om met die liefdevolle deernis van Christus Jesus!

9 Ek bid dat julle liefde vir mekaar meer en meer sal word deurdat julle ’n al beter begrip en ’n fyn aanvoeling ontwikkel.

10 Dit sal julle in staat stel om dié dinge te onderskei wat regtig saak maak. Dit sal julle ook help om skoon en onberispelik te lewe tot op die dag wanneer Christus terugkom.

11 Dan sal julle hele lewe vol wees van die goeie gevolge van julle gehoorsaamheid aan die wil van God – goeie gevolge wat Jesus Christus bewerk het. God sal daarvoor geëer en geprys word!

Christus word gepreek, selfs in

die tronk

12 Julle moet weet, broers en susters, dat dit wat met my gebeur het, gelei het tot bevordering van die Goeie Nuus.

13 Dit het vir almal hier, ook vir die soldate van die paleiswag, duidelik geword dat ek in die tronk is ter wille van Christus.

14 En die meerderheid medegelowiges hier is só deur my gevangenskap in hulle vertroue in die Here versterk dat hulle dit al hoe meer waag om oor die boodskap van God te praat sonder om bang te wees.

15 Daar is wel sommige wat dit doen omdat hulle jaloers is of iets teen my het, maar daar is ook ander wat Christus met goeie bedoelings bekendmaak.

16 Hulle doen dit uit liefde omdat hulle weet dat ek hier is om die Goeie Nuus te verdedig.

17 Maar dié wat in eiebelang Christus verkondig, doen dit met onsuiwer motiewe. Hulle bedoeling is om die swaarkry van my gevangenskap nog swaarder te maak.

18 Maar wat maak dit saak? Of hulle motiewe nou onsuiwer of suiwer is – die feit is dat Christus op allerhande maniere verkondig word, en daaroor is ek baie bly!

Paulus se lewe vir Christus

My blydskap sal ook voortduur,

19 want ek weet dat deur julle voorbidding en die hulp van die Gees van Jesus Christus alles op my vrylating sal uitloop.

20 Dit is my strewe en hoop dat ek nooit iets sal doen waaroor ek my sal hoef te skaam nie. Ek wil eerder, soos nog altyd, ook nou in my hele bestaan – of ek bly leef en of ek moet sterf – Christus met volle vrymoedigheid verheerlik.

21 Want vir my is die lewe Christus, en die sterwe wins.

22 As ek aanhou lewe, kan ek vrugbaar werk. Ek weet regtig nie wat om te kies nie!

23 Ek is in ’n tweestryd. Aan die een kant verlang ek om te vertrek en bý Christus te wees, want dit is vir my verreweg die beste.

24 Aan die ander kant is dit vir julle belangriker dat ek bly lewe.

25 Dit weet ek vas en seker: my blywende betrokkenheid by julle almal sal daartoe lei dat julle groei en blydskap in julle geloof sal beleef.

26 Dan, wanneer ek weer by julle is, sal julle nog meer rede hê om dit wat Christus Jesus deur my gedoen het, te besing.

’n Leefstyl wat pas by die Goeie

Nuus

27 Hoofsaak is dat julle leefstyl moet pas by die Goeie Nuus van Christus. Só sal ek dan as ek kom, sién of as ek nie kan kom nie, hóór dat julle met één gees vasstaan en soos ’n span eendragtig saamveg vir ons geloof in die evangelie.

28 Ek sal hoor dat teenstanders julle glad nie afskrik nie. Vir hulle is dit ’n bewys dat hulle verlore gaan, maar vir julle is dit ’n bewys dat God self julle red!

29 Aan julle is immers die voorreg gegee om Christus te dien, nie alleen deur in Hom te glo nie, maar ook deur vir Hom te ly.

30 Julle voer dieselfde stryd wat julle my vroeër sien stry het. En soos julle gehoor het, duur my stryd nog steeds voort.

—https://api-cdn.youversionapi.com/audio-bible-youversionapi/553/32k/PHP/1-59fd6bd52ad4b567f33b05fc40a4556b.mp3?version_id=117—

Categories
FILIPPENSE

FILIPPENSE 2

Wees eensgesind en sien in

nederigheid na mekaar om

1 Julle is mos deur Christus bemoedig en deur sy liefde getroos! Julle het die gemeenskap beleef wat die Gees bewerk! Julle weet wat omgee en meelewing beteken!

2 Maak my dan nou heeltemal bly deur eensgesind te wees – één in liefde, één in hart en één in doel.

3 Moet niks uit selfsug doen of om daarmee te spog nie. Wees eerder nederig deur van medegelowiges meer te dink as van jouself.

4 Julle moenie net elkeen na sy eie belange omsien nie, maar ook na mekaar se belange.

Volg Jesus Christus se voorbeeld

5 Julle gesindheid moet soos Jesus Christus s’n wees:

6 Alhoewel Hy self God was,

het Hy nie vasgeklou

aan die Goddelikheid wat Hom

toekom nie,

7 maar Hy het dit prysgegee:

Hy het ’n slaaf geword

en aan mense gelyk geword.

En toe Hy as mens geleef het,

8 het Hy Homself

nog verder verneder

deur tot die dood toe

gehoorsaam te wees,

ja, tot die kruisdood toe!

9 Daarom het God Hom ook

tot die hoogste posisie verhoog

en aan Hom die Naam gegee

wat belangriker is

as elke ander naam.

10 Só sal by die noem

van Jesus se heerlike Naam

elke knie in die hemel

en op die aarde

en onder die aarde buig,

11 en elke tong sal bely:

“Jesus Christus is Here!”

En só sal God die Vader

verheerlik word!

Julle moet ligdraers in ’n donker

wêreld wees

12 My geliefdes, julle was altyd baie gehoorsaam toe ek by julle was. Noudat ek weg is, moet julle nog meer gehoorsaam wees. Vol ontsag en eerbied vir God moet julle voortgaan om aan julle verlossing gestalte te gee.

13 Dis mos God wat die gewilligheid en die vermoë in julle bewerk om te handel volgens wat Hy graag wil hê!

14 Doen alles sonder kla of teëpraat.

15 Dan sal julle as onberispelike kinders van God bo verdenking staan. Julle sal skoon lewe in ’n wêreld vol oneerlike en perverse mense. Skyn in hierdie donker wêreld soos helder sterre

16 deur noukeurig te leef volgens die boodskap wat tot die lewe lei. Dan, wanneer Christus terugkom, sal ek tevrede wees dat ek nie verniet gejaag en geswoeg het nie.

17 Selfs al word my lewe soos ’n drankoffer uitgegiet bo-op die offer van julle gelowige diens aan God, is ek bly daaroor en wil ek saam met julle almal bly wees daaroor.

18 Laat my vreugde hieroor ook julle vreugde wees!

Timoteus gaan Filippi toe

19 Ek hoop om, as die Here Jesus wil, binnekort vir Timoteus na julle toe te stuur. Dit sal my goeddoen as ek weet hoe dit met julle gaan.

20 Ek beskou Timoteus immers as die enigste persoon wat met ’n opregte gesindheid aan julle belange aandag sal gee.

21 Al die ander soek net hulle eie belang en nie dit wat vir Jesus Christus saak maak nie.

22 Julle weet egter hoe Timoteus homself bewys het. Soos ’n seun sy pa help, het hy saam met my gewerk om die Goeie Nuus uit te dra.

23 Ek hoop om juis hóm na julle toe te stuur sodra ek duidelikheid het oor my eie posisie.

24 Ek vertrou dat, as die Here wil, ek self ook binnekort na julle toe sal kan kom.

Epafroditus gaan Filippi toe

25 Ek het gedink ek behoort Epafroditus, my broer, medewerker en medestryder, wat deur julle gestuur is om my in my nood by te staan, na julle toe terug te stuur.

26 Hy verlang baie na julle almal en was bekommerd omdat julle gehoor het dat hy siek is.

27 Hy was regtig doodsiek, maar God het genade aan hom bewys – nie net aan hom nie, maar ook aan my – sodat ek nie nog groter hartseer sou moes verduur nie.

28 Ek stuur hom dus sommer dadelik terug sodat julle, wanneer julle hom sien, bly kan wees en ek minder bekommerd.

29 Verwelkom hom dan in die Here met volle blydskap en respekteer mense soos hy,

30 want vir die werk van Christus het hy by die dood omgedraai. Hy het sy lewe gewaag om my namens julle te help.

—https://api-cdn.youversionapi.com/audio-bible-youversionapi/553/32k/PHP/2-b089fb081a2b3893af201603bbaaa8c2.mp3?version_id=117—

Categories
FILIPPENSE

FILIPPENSE 3

Die ongelooflike wins van geloof

in Jesus Christus

1 Verder, my broers en susters, wees bly omdat julle aan die Here verbind is. Om weer hieroor vir julle te skryf maak my nie moeg nie, en vir julle gee dit duidelikheid.

2 Pas op vir daardie rondloperhonde, pas op vir daardie kwaaddoeners, pas op vir die mense van die versnydenis!

3 Ons wat God deur sy Gees dien, het mos klaar die ware besnydenis. Ons beroep ons op wat Christus Jesus gedoen het en nie op menslike dinge nie.

4 Nietemin sou ek ook op menslike dinge kon vertrou. As iemand meen om op menslike dinge te vertrou, ek nog méér!

5 Ek is op die agtste dag besny. Ek is ’n gebore Israeliet, uit die stam van Benjamin. ’n Egte Hebreër! As lid van die Fariseërs het ek streng volgens Joodse wette gelewe.

6 Ek was fanaties en het die kerk vervolg! Wat wetsgehoorsaamheid betref as metode om my saak met God reg te maak, was ek onberispelik!

7 Alhoewel ek hierdie menslike dinge eers as ’n wins beskou het, beskou ek dit ter wille van Christus nou as ’n verlies.

8 Ja, om Christus Jesus, my Here, te ken is só wonderlik dat ek alle ander dinge as ’n verlies beskou. Ter wille van Hom het ek alles as verlies afgeskryf. Ek beskou dit as gemors sodat ek Christus as wins kan verkry

9 en een met Hom kan wees.

Ek probeer nie langer my saak met God regstel deur die wet te gehoorsaam nie, maar deur in Christus te glo. Deur die geloof stel God ons saak met Hom reg.

10 Op hierdie manier kan ek Christus ken en die krag beleef wat Hom laat opstaan het. Deur saam met Hom te ly kry ek deel aan sy dood

11 in die hoop dat ek die opstanding uit die dood kan beleef!

Hoe om as gelowige doelgerig te

lewe

12 Nie dat ek dit alles al bereik het, of al klaar volmaak is nie. Maar ek hou aan jaag om dit myne te maak omdat Christus Jesus my Sýne gemaak het!

13 Nee, broers en susters, ek reken self nie dat ek al is wat ek moet wees nie, maar een ding is seker: ek vergeet dit wat agter my lê, en strek my uit na dit wat voorlê.

14 Ek jaag wenpaal toe, na die hemelse prys wat God deur Christus Jesus aan my gee.

15 Almal van ons wat geestelik volwasse is, behoort hierdie doel te hê. As daar enigiets is waaroor julle anders dink, sal God ook dít vir julle duidelik maak.

16 Nietemin, laat ons aanhou loop op die pad waarmee ons tot hiertoe gekom het.

17 Ja, broers en susters, volg my voorbeeld en hou julle oë op die mense wat volgens ons voorbeeld lewe.

18 Want – ek het julle al vroeër gesê, en met groot hartseer moet ek dit nou weer sê – daar is baie wie se lewe wys dat hulle vyande van die kruis van Christus is.

19 Ewige vernietiging is hulle uiteinde, liggaamlike behoeftes is hulle god en skandelike dinge is hulle trots. Al waaraan hulle dink, is aardse dinge.

20 Ons, daarteenoor, het ons burgerskap in die hemel. Van dáár verwag ons ook die Here Jesus Christus as Verlosser.

21 Hy sal ons vernederde liggame verander in liggame met goddelike heerlikheid, soos sy eie. Hiervoor sal Hy dieselfde krag gebruik as dié waarmee Hy alle dinge onder sy gesag bring.

—https://api-cdn.youversionapi.com/audio-bible-youversionapi/553/32k/PHP/3-d0e1c9c2ecea463ea2d0ab86edc07a48.mp3?version_id=117—

Categories
FILIPPENSE

FILIPPENSE 4

1 My broers en susters, ek het julle lief en verlang baie na julle. Júlle maak my bly, ja, op júlle is ek baie trots. Geliefdes, bly dan nou regtig getrou aan die Here.

Laaste opdragte aan die

gemeente

2 Ek moedig sowel Euodia as Sintige aan om hulle meningsverskille op te los omdat hulle aan die Here verbonde is.

3 En ek vra ook dat jy, getroue kollega, hulle sal help. Hulle het hard gewerk saam met my en ook saam met Klemens en die ander medewerkers om die Goeie Nuus uit te dra. Hulle almal se name staan opgeskryf in die Boek van die Lewe.

4 Wees altyd bly omdat julle weet dat julle aan die Here behoort. Ek sê dit weer: “Wees bly!”

5 Laat almal sien hoe bedagsaam julle lewe. Onthou: Die Here kom binnekort!

6 Moet oor niks bekommerd wees nie, maar bid oor alles. Vra alles wat julle nodig het van God, terwyl julle Hom ook dank vir alles wat Hy doen.

7 En God se vrede, wat meer is as wat ’n mens dink, sal oor julle harte en gedagtes die wag hou omdat julle aan Christus Jesus verbonde is.

8 Ten slotte, broers en susters, vul julle gedagtes met alles wat waar, eerbaar, skoon, suiwer, lieflik en lofwaardig is.

9 En leef volgens alles wat julle van my geleer, oorgeneem, gehoor en gesien het. Dan sal die God wat vrede gee, by julle wees.

Paulus sê dankie vir die

Filippense se ondersteuning

10 Ek prys die Here met groot blydskap omdat julle weer ’n slag aan my kon dink. Ek weet julle het eintlik heeltyd aan my gedink, maar het net nie die geleentheid gehad om iets te doen nie.

11 Ek sê dit nie omdat ek iets kortkom nie. Ek het regtig geleer om onder alle omstandighede reg te kom.

12 Ek weet wat dit is om boomskraap te lewe, en ek weet wat dit is om oorvloed te hê. Ek het lewenservaring opgedoen vir alle omstandighede, vir wanneer ek genoeg het om te eet én wanneer ek honger is, vir oorvloed én tekort.

13 Ek kan alles doen deur Hom wat my krag gee.

14 Nietemin, julle het goedgedoen deur my in my swaarkry by te staan.

15 Julle, Filippense, weet wat in die beginjare met die uitdra van die Goeie Nuus gebeur het. Toe ek van Masedonië af vertrek het, het geen gemeente behalwe julle my finansieel ondersteun nie.

16 Selfs toe ek in Tessalonika was, het julle meer as een keer iets gestuur om my te help.

17 Nie dat ek ’n skenking soek nie; ek soek die resultaat daarvan: groter krediet op julle rekening!

18 Op hierdie stadium het ek alles ontvang – en meer as genoeg! Met dit wat julle saam met Epafroditus gestuur het, het ek alles wat ek nodig het. Wat julle gestuur het, is ’n lieflike reukoffer waarvan God hou.

19 Omdat Christus Jesus dit verdien het, sal my God uit sy heerlike rykdom vir julle voorsien in elke behoefte wat julle het.

20 Aan dié God, wat ook ons Vader is, behoort die heerlikheid tot in alle ewigheid. Amen.

Groeteboodskappe

21 Dra my groete oor aan Christene daar. Al die broers en susters hier by my stuur groete.

22 Al die ander Christene stuur ook groete, in besonder dié wat in die keiser se paleis werk.

23 Mag ons Here Jesus Christus se genade julle geestelik versterk.

—https://api-cdn.youversionapi.com/audio-bible-youversionapi/553/32k/PHP/4-de9be9ad2a989d045f51b3147c0e88d3.mp3?version_id=117—

Categories
KOLOSSENSE

KOLOSSENSE 1

1
Paulus en Timoteus skryf aan

die gelowiges in Kolosse en

Hierdie brief kom van Paulus wat deur God gekies is om ’n apostel van Christus Jesus te wees. Ons broer Timoteus skryf hierdie brief saam met my.

2 Ons skryf aan God se mense in Ko­los­se, gelowi­ge broers en susters wat aan God verbonde is. Mag die ge­nade en vre­de van God ons Vader met julle wees.

Paulus dank God vir die

Kolossense se getuienis en bid

3 In al ons gebede dank ons God, die Va­der van ons Here Jesus Christus, vir julle,

4 want ons het gehoor dat julle in Christus Jesus glo en van julle liefde vir al God se mense.

5 Julle doen dit omdat julle hoop om dit te ontvang wat in die hemel vir jul­le gereed lê. Julle het daarvan gehoor toe die waarheid van die Goeie Nuus aan jul­le verkondig is.

6 Dieselfde Goeie Nuus wat julle bereik het, gaan ook oor die he­le wêreld uit. In die hele wêreld dra dit goeie vrug en versprei dit, net soos dit by jul­le gebeur het vanaf die dag toe julle die waar­heid oor God se genade gehoor en verstaan het.

7 Epafras, ons geliefde medewerker, het julle daar­van geleer. Sy getroue diens aan Christus is in julle belang.

8 Dit is hý wat ons vertel het van die lief­de wat die Gees in julle bewerk het.

9 Van die dag af wat ons dít oor julle gehoor het, hou ons daarom nie op om vir julle te bid nie. Ons vra God dat Hy gees­te­like wysheid en insig aan julle sal gee so­dat julle heeltemal seker sal wees van wat Hy wil hê.

10 Ons bid ook dat julle leefstyl tot eer van die Here sal wees om Hom te behaag deurdat jul­le lewe vol goeie werke sal wees en dat julle God al hoe beter sal leer ken.

11 Ons bid dat Hy deur die krag van sy god­delike heerlikheid julle sal toe­rus met al die krag wat julle nodig het om in alle omstandighede geduldig te volhard terwyl julle met blydskap

12 altyd die Vader dank dat Hy julle geskik gemaak het om in die erfenis van God se mense te deel, die erfenis wat wag vir mense wat vol­gens sy wil lewe.

13 Hy het ons verlos uit die mag van die duisternis en ons oorgebring on­der die ko­nings­heerskappy van sy gelief­de Seun.

14 Deur die Seun het ons verlos­sing ver­kry, naamlik die verge­wing van son­de.

’n Lied oor die heerlikheid van

die Seun

15 Die Seun is die sigbare uitbeelding

van die onsigbare God.

Hy is die Eerste

van die hele skepping,

16 omdat God alles

deur Hom geskep het.

Ja, alles in die hemel

en op die aarde –

die dinge wat gesien kan word

en die dinge wat nie gesien

kan word nie,

of dit nou konings

of heersers, regeerders

of magshebbers is –

álle dinge is deur Hom

en vir Hom geskep.

17 Hý was daar vóór alles,

en in Hom word alles

saamgebind.

18 Hý is die hoof van die kerk,

sy liggaam.

Die Seun is die begin.

Hy is die Eerste

wat uit die dood opgestaan het

sodat Hy inderdaad eerste

in alle dinge is.

19 God het dit goedgedink

om met sy volle Goddelikheid

in die Seun te woon,

20 en om deur Hom alles

met Homself te versoen.

Deur die bloed van sy Seun

aan die kruis

het Hy vrede gemaak.

Ja, deur Hom het Hy alles

op die aarde

en in die hemel

met Homself versoen.

Ons stukkende verhouding met

God is reggemaak

21 Eers was julle ook ver van God af. Met verkeerde da­de het julle gewys dat julle Hom vyandiggesind is.

22 Maar nou het Hy julle met Homself versoen deurdat sy Seun as mens gesterf het om julle voor Hom as sy eie mense te laat staan, skoon en foutloos.

23 Maar dan moet julle aanhou glo. Julle moet onwrikbaar vas bly staan en nie die verwagting laat vaar wat in julle gewek is toe julle die Goeie Nuus gehoor het nie. Hierdie Goeie Nuus is aan almal onder die son verkondig. En ek, Paulus, het hiervan ’n dienaar ge­word.

God se geheim is bekend:

Christus leef in ons!

24 Ek is nou bly dat ek tot julle voordeel kan swaarkry. Ek is bly dat ek die deel van Christus se vervolging wat nog oor­bly, kan help dra. Ek verduur dit in mý lig­gaam tot voordeel van sý liggaam, die kerk.

25 Ek is ’n dienskneg van dié kerk. God het my die verant­woor­delikheid gegee om aan julle sy volle bood­skap bekend te maak.

26 Hierdie boodskap was vir eeue en geslagte lank ’n geheim, maar nou het God dit aan sy eie mense bekendgemaak.

27 God het be­sluit om aan hulle bekend te maak hoe wonder­lik die heer­likheid van hierdie geheim vir alle volke is. Die ge­heim is: Christus leef in julle. Dit is die vooruitsig dat julle in die hemelse heer­lik­heid sal deel.

28 Juis Hom verkondig ons! Ons doen dit deur elke mens te waarsku en met alle moontlike wysheid te onderrig.

So wil ons graag elke mens in ’n vol­maak­te verhou­ding met Christus voor God laat staan.

29 Hiervoor werk en stry ek met Christus se krag wat magtig in my aan die werk is.

—https://api-cdn.youversionapi.com/audio-bible-youversionapi/553/32k/COL/1-9cbf4768e0cc36e354ccba3e8081efff.mp3?version_id=117—

Categories
KOLOSSENSE

KOLOSSENSE 2

Paulus se stryd sodat gelowiges

God se geheim kan ken

1 Ek wil hê julle moet weet hoe hard ek stry – vir julle, vir die gelowiges in Laodisea en vir al die ander gelowi­ges wat my nog nie persoonlik ont­moet het nie.

2 Dit is my doel dat hulle moed sal skep en deur liefde aan mekaar verbind sal wees. Ek wil hê dat hulle insig skat­ryk en oor­vloedig sal wees, ja, dat hul­le God se ge­heim heelte­mal moet ken, naamlik: Christus.

3 In die een­heids­band met Christus is al die ge­hei­me skat­te van wysheid en kennis te vind.

4 Ek skryf dit vir julle sodat niemand julle met mooi­praatjies om die bos kan lei nie.

5 Al is ek nie persoonlik teenwoordig nie, is ek in die gees by julle. Ek is bly om te sien hoe ordelik julle is en hoe vas julle geloof in Jesus Christus is.

Julle het saam met Christus

gesterf en opgestaan

6 Noudat julle Christus Jesus as Here aangeneem het, moet julle lewe soos mense wat aan Hom verbonde is.

7 Bly in Christus geanker en bou op Hom, standvastig in die geloof soos julle ge­leer is, en loop oor van dankbaarheid.

8 Wees op julle hoede en laat niemand julle op sleep­tou neem met ’n leë, mis­lei­den­de filosofie wat wel rekening hou met menslike tradisie en met wêreldse magte, maar nie met Christus nie.

9 Die volheid van God is mos liggaamlik in Christus teen­woor­dig.

10 En omdat julle één is met Christus deel julle in sy volheid – Hy wat die hoof is van elke heerskappy en gesag.

11 Omdat julle één is met Christus is jul­le ook be­sny, nie met ’n besnydenis deur men­se nie, maar met die besnydenis van Christus. Hierdie besnydenis bestaan uit die wegneem van julle sondige geaardheid.

12 Toe julle gedoop is, is julle saam met Chris­tus begrawe. Omdat julle één is met Hom is julle ook saam met Hom opgewek. Julle geloof in die krag van God het dit moontlik gemaak – hierdie selfde krag wat Jesus uit die dood opgewek het!

13 Julle was eintlik dood omdat julle ge­sondig het en omdat julle sondige geaardheid nog nie weggeneem was nie. God het julle egter saam met Chris­tus lewendig gemaak. Hy het ons al ons sondes vergewe.

14 Hy het die do­kument met voorskrifte wat as klag­staat teen ons gedien het, uitgevee en dit vir goed weggevat deur dit aan die kruis vas te spyker.

15 So het Hy die re­geer­ders en gesagvoerders ontwapen. Hy het hulle in die openbaar bespotlik ge­maak deur aan die kruis oor hulle te triomfeer.

16 Moet dus nie toelaat dat enigie­mand julle ver­oor­deel oor wat julle eet of drink, of oor die vier van sekere fees­dae of die Nuwemaanfees of Sabbat­te nie.

17 Al hier­die dinge is net ’n skaduwee van wat sou kom. Die ware werklikheid is Chris­tus!

18 Laat niemand wat aandring op selfver­ne­de­ring en en­gel­verering – en dit met ’n be­roep op visioene! – julle op sleeptou neem nie. Verniet dink hierdie mense, ti­pies van hulle sondige geaardheid, baie van hulleself.

19 Hulle is nie aan die hoof ver­bind uit wie die hele liggaam groei nie. Vanuit die hoof groei die hele liggaam, on­der­steun en saamgebind deur gewrigte en spiere. Gód laat dit groei!

20 Aangesien julle, deur saam met Chris­tus te sterf, die bose wêreldse mag­te af­ge­sterf het, waarom leef julle nog vol­gens wê­reldse voorskrifte soos:

21 “moenie vat nie”, “moenie dit eet nie” en “moe­nie aan­raak nie”?

22 Dit is alles dinge wat ver­bruik word en vergaan – soos dit gaan met mens­ge­maak­te voorskrifte en leringe.

23 Met hul­le self­uitgedinkte godsdienstige toe­wy­ding, self­vernedering en streng liggaam­like dis­si­pline het hierdie voorskrifte nogal die re­putasie dat hulle wysheid bevat. Inderwaar­heid is hulle nutteloos vir die beheer van die sondige geaardheid.

—https://api-cdn.youversionapi.com/audio-bible-youversionapi/553/32k/COL/2-6322ec280f81b3e884aa0334ddedb8a5.mp3?version_id=117—

Categories
KOLOSSENSE

KOLOSSENSE 3

Hoe om die nuwe lewe wat

Christus gee, te leef

1 Aangesien julle saam met Christus tot ’n nuwe lewe opgewek is, streef na die dinge wat daarbo by Christus is, waar Hy aan die regterhand van God sit.

2 Laat julle gedagtes beheer word deur die hemelse dinge, nie deur dinge op die aarde nie.

3 Jul­le het mos saam met Christus gesterf en julle lewe is saam met Hom veilig by God wegge­steek.

4 Wanneer Christus, wat jul­le le­we is, by sy wederkoms verskyn, sal jul­le ook saam met Hom in heerlikheid ver­skyn.

5 Daarom moet julle die volgende wê­reldse dinge afsterf wat deel van julle lewe is: seksuele sondes, onreinheid, wel­lus, sleg­te begeertes en gierigheid, wat van geld ’n god maak.

6 Dit is oor sul­ke goed dat God se straf ongehoorsame mense tref.

7 Vroeër was hier­die dinge ook deel van julle leefstyl.

8 Maar nou moet julle ook nog van al die volgende ontslae raak: kwaad wees, woedebuie, gemeenheid, gevloek. Vuil taal moenie uit julle mond kom nie.

9 Moenie vir me­kaar lieg nie. Julle het mos die vorige mens en sy prakty­ke soos klere uitgetrek

10 en die nuwe mens aangetrek. Hierdie mens kry voort­durend nuwe insig en word só ver­ander en nuut gemaak om al meer soos sy Skepper te lyk.

11 In hierdie nuwe lewe is daar nie langer sprake van Griek of Jood, besny of onbesny, ongekultiveerd, barbaars, slaaf of vry man nie. Al wat saak maak, is Christus wat alles in elkeen is.

12 Julle is die mense wat God uitge­kies het wat Hy geheilig het en wat Hy lief­het. Daarom moet julle die volgende soos kle­re aantrek: liefdevolle deernis, vriendelikheid, nederigheid, sagmoe­dig­heid, geduld.

13 Verdra mekaar en as enigeen ’n klag­te teen iemand anders het, vergewe me­kaar. Vergewe me­kaar soos die Here julle ver­gewe het.

14 Die heel belangrikste wat jul­le moet aan­trek, is die liefde. Die liefde bind alles volmaak saam.

15 Verder, laat die vre­­de wat Christus bewerk het, in jul­le le­wens die deurslag gee; want as le­de van een lig­gaam is julle tot vrede ge­roep. En wees dank­baar.

16 Laat die rykdom van alles wat Chris­tus ons leer, julle leefstyl bepaal. Met alle wys­heid moet julle mekaar on­derrig en me­kaar die regte pad wys. Sing met dank­ba­re harte psalms, lofgesange en geesteli­ke liedere tot eer van God.

17 Verder, doen al­les – of dit nou met woorde of dade is – in die Naam van die Here Jesus. Só is julle heeltyd besig om deur Hom dank aan God die Vader te bring.

Hoe Christenskap verhoudings

bepaal

18 Vroue, wees aan julle mans onderda­nig soos dit pas by mense wat met Chris­tus één is.

19 Mans, julle moet julle vroue liefhê en julle moenie griewe teen­oor hulle opbou nie.

20 Kinders, julle moet in elke opsig aan julle ouers ge­hoorsaam wees, want dan is die Here tevrede.

21 Ouers, moenie aanhou foutvind met julle kinders sodat hulle moed verloor nie.

22 Slawe, julle moet julle eienaars hier op aarde in elke opsig gehoorsaam. Jul­le moenie mense pro­beer tevrede stel deur net te werk as iemand kyk nie. Nee, werk met opregtheid van hart om­dat julle eer­bied vir die Here het.

23 Pak alles gemoti­veerd aan. Werk soos vir die Here en nie soos vir mense nie.

24 Weet dat die Here jul­le met ’n erfdeel sal beloon. Die Eie­naar vir wie julle werk, is Christus!

25 Wie onreg doen, kry hulle onreg terug. God trek nie­mand voor nie.

—https://api-cdn.youversionapi.com/audio-bible-youversionapi/553/32k/COL/3-e35551c17265fb0c137b1616f1fadb46.mp3?version_id=117—